Frente Obrero Liberashon 30 di mei, ta konmemorá djabierne, dia 30 di mei 2008, e di 39 aña di e lantamentu obreril pa a eksigui Igualdat i Rèspèt.

E suseso aki sin duda a kambia positivamente historia Laboral di Kòrsou i di Antia.

Wilson “Papa“ Godett, esun ku a guia e lucha huntu ku su kompañeronan, a sa di marka su influensia komo e gran luchadó pa e klase trahadó den Siglo 21. Ku satisfakshon por bisa despues di 39 aña, ku tur aña e lucha ta wòrdu rekordá. E lucha di 30 di Mei 1969 a sa di influensia introdukshon di leinan sosial den nos pais!

Partido Frente Obrero, konsiente di e importansia di e fecha históriko aki, ta sigui duna rekonosementu, rèspèt i apresio na esnan ku a pone nan bida pa un kousa hustu na peliger 39 aña pasa. Esakinan tabata Orlando Gerardina i Manuel Antonio Gutierrez ku a pèrdè nan bida 39 aña pasa i otronan ku a wòrdu herida.

Partido Frente Obrero Liberashon 30 di mei, ta konmemorá 30 di mei 1969, djabierne na un manera serio i trankil. E konmemorashon ta kuminsá nueb’or di mainta na santana di Roodeweg ku butamentu di krans na grafnan di difuntunanWilson Papa Godett, Amos Nita i Bernhard (Ben) Komproe, despues ta sigui pa santana di Groot Kwartier kaminda ta buta krans na graf di Manuel Antonio Gutierres, na Bonam na graf di Al Peterson i despues finalmente na santana di Sta. Maria, kaminda lo pone krans na grafnan di Amador Poulo Nita i Orlando Gerardina.

Gobièrnu di Kòrsou entre sink’or i shet’or atardi ta konmemorá ofisialmente e fecha memorabel i históriko aki na kaya Wilson “Papa” Godett den Pietermaai (Biblioteka Publiko) i orador di orden lo ta Ed Gumbs. Kordinashon di e akto seremonila aki ta den man di Kas di Kultura i Fundashon Wilson “Papa“ Godett..

Konmemorashon ta kontinuá 8'or di anochi na sede di Frente Obrero Liberashon 30 di mei, na Winston Churchillweg 102 ku manifestashon di gruponan ritmiko kultural kombina ku shou di Bòkseo. Esaki ta pa kumpli ku e deseo di semper di Wilson “Papa“ Godett, pa semper hóbennan keda práktika deporte.

Lider polítiko di Frente Obrero Liberashon 30 di mei, señor Anthony A. Godett i alabes diputado enkarga ku vivienda, infrakstruktura, transporte publiko i agrekultura, na nòmber di Frente Obrero Liberashon 30 di mei i Fundashon Wilson “Papa” Godett ta invitá pueblo di Kòrsou i spesialmente hóbennan pa bin partisipá na e konmemorashon importante aki.

Dor di konosé Bo historia, un diferensia ta wòrdu hasi pa futuro. E spiritu di esnan ku a lucha no mag di bai pèrdí, ta p’esei tin di sigui konmemorá, siña di fayonan, koregí esakinan.

Frente Obrero Liberashon 30 di mei, ta sigui ku e lucha di Wilson “Papa“ Godett, manera e a yega di pidi su siguidonan, esta, “Si mi muri sigui mi lucha“.

Na nòmber di Partido Frente Obrero Liberashon 30 di mei